Orchidaceae

Na raming is daar 730 genera en 25 000 spesies orgideë wêreldwyd. In Suid-Afrika is bykans 500 spesies; in die Kleinmond-omgewing is daar ongeveer 70 spesies. Die familie is baie gevarieerd, maar almal het die volgende kenmerke: Die meeste blomme is onderstebo. Voordat die blom oopgaan, roteer (resupinate) die blomsteel 180°. Blomme is bilateraal simmetries. As jy die blom vertikaal in twee deel, is die twee helftes spieëlbeelde van mekaar. Die blom het drie kelkblare en drie kroonblare. Een van die kroonblare is omvorm tot ’n lip (labellum) wat ’n horisontale landingsplek vir bestuiwers vorm. ’n Blom het een of twee meeldrade wat saamgesmelt is met die stamper om 'n kolom te vorm. Bestuiwing word deur 'n spesifieke insek per spesie uitgevoer en in uitsonderlike gevalle deur 'n voël of vlermuis. Elke blom het tot miljoene mikroskopies klein saadjies. Ontkieming en ontwikkeling van saad is afhanklik van swamme. Plantjies ontwikkel uit ’n knol-agtige organisme, die proto-knol (protocorm). Origideë word in twee groepe verdeel: die epifiete, wat op boomstamme en organiese materiaal groei en hoofsaaklik in die trope voorkom, en die grond-orgideë. Die epifiete, skaars in Suid-Afrika, het lugwortels wat dien as anker, stoorruimte, voedselopnemers, respirators en selfs fotosinteerders. Die wortels is tot naby die punte bedek met ’n wit weefsel, velamien, wat water kan stoor, die lugwortels teen koue en hitte beskerm en as hegmiddel aan die gasheerplant dien. Die punte van die lugwortels absorbeer voedingstowwe uit reënverdunde voëlmis en verrotte plantreste. Grond-orgideë groei teen berghange, op vlaktes en sandduine en in vleilande. Die meeste het geswolle stamme of wortels wat water en reserwe-voedsel stoor. Die meeste blom net na die reënseisoen en is dormant in die droë seisoen.