Kleinmond
Plantspesies (waarvan 77 net hier voorkom)
Die Kogelberg Biosfeer bied ‘n tuiste aan meer as 1 880 plantspesies waarvan 77 op geen ander plek op aarde voorkom nie.
In die kern van hierdie fynbosparadys lê Kleinmond met ’n netwerk van toeganklike voetslaanpaadjies langs die kus, langs rivieroewers, deur vleilande, oor sandvlaktes, in klowe, teen berghellings, oor plato’s en tot bo-op hoë pieke. Dit bied vir natuurliefhebbers van byna enige fiksheidsgraad ongeëwenaarde geleenthede om die rykdom en biodiversiteit van die inheemse fynbos in sy natuurlike omgewing waar te neem.
Met Kleinmond Fynbos fokus ons op die spesies wat redelik algemeen in Kleinmond en omgewing voorkom.
Ons vertel waar en wanneer ons hulle raakloop. Ons gee nie alleen die botaniese name nie, maak ook die volksname en interessante inligting oor hulle habitat, ekologie en bewaringstatus. Die verskillende soekfunksies en groot verskeidenheid foto’s maak die identifisering van spesies vir almal, van die beginner tot die kundige, maklik.
Soek hier deur ons plantspesies:
Kyk uit vir hierdie spesies wat nou blom:
Protea acaulos
’n Klein dwergstruikie wat ’n digte mat vorm. Die plant kan tot ’n meter in deursnee word. Die ondergrondse takstelsel kan brande oorleef en dadelik na ’n brand nuwe blare uitstoot.
Die blaarvorm kan baie wissel. Dit is soms breed met ronde punte, soms eiervormig en soms baie smal (10 mm). Die blare wys almal na een kant toe (secund leaves).
Blomme is koppievormig en 30-60 cm in deursnee. Die omwindselblare is groen met rooi punte.
Diastella fraterna
Dit is ’n ronde klein struikie wat omtrent altyd sagte wit blomme dra. Die takkies is minder houterig as dié van ander Proteaceae. Die struikie is enkelstammig en breër as wat dit hoog is.
Die blare is klein, lank en smal met gladde rande, soos dakpanne gerangskik aan die takke. Daar is soms 2 of 3 tande aan die toppunt van die blaar. Jong blare is gedraai.
Die klein wit bloeiwyses wat deur die jaar verskyn, het kenmerkende wit omwindselblare wat later bruin en papieragtig word. Hulle lyk soos sagte poeierkwassies.
Die saad is ’n gryserige wit neut, gekeep aan die basis en ongeveer 5 mm lank. Dit is groot in vergelyking met die klein blomhofie. Slegs een vrug ontwikkel in elke blomhofie. Dit val uit sodra dit ryp is.
Erica hispidula
’n Regop struik tussen 1 en 2 m hoog.
Blare en takke is harig en die blare is in drieë om die takke gerangskik.
In blomtyd is die struik oortrek van blommetjies wat wit of pienk en meestal klokvormig en effens taai is. Die kroonblare is maar 1 mm lank. Die stempel is helder rooi en steek bokant die kroonblare uit, en dit is ook hoe jy hom kan onderskei van ander piepklein Erica-blommetjies.
Kom wydverspreid voor en elke gebied het sy eie blomtyd. Hulle groei in groot stanings en is dikwels die volopste spesie in die gebied.
Brunia paleacea
Digte ronde struik met baie vertakkings tot 1 m hoog. Smal driehoekige, bykans haarlose blare, buig inwaards, sit styf teen die stingel en is 3 – 6 mm lank. Brandbestand, herspruit vanuit ondergrondse stamvoet. Roomkleurige blomme, elkeen geset in ’n blomkrans van opsigtelike smal wit tot pienk skutblare tot 7 mm in deursnee. Verskyn in trosse op die punte van stingels wat uit die hoofstam vertak.
Disa bracteata
Slank tot taamlik stewige plant tot 50 cm. Spiesvormige regop blare groei uit stam. Baie blomme in lang rits, skutblare soms langer as blom. Blomme groen, kelkblare maroen getint. Middelste kelkblaar soos vlak kappie, sy-kelkblare langwerpig, staan weg, kroonblare regop. Lip smal, hang af. Spoor effens driehoekig, hang af.
Mimetus hirtus
’n Enkelstammige, regop struik met baie takke. Dit kan tot 2,5 m hoog groei. Die bas is glad en rooierig. Anders as ander spesies in die genus groei hulle graag in digte stanings.
Die takke het lang smal blare wat oor mekaar lê en die stam wegsteek. Blare, blaarrande en takke is bedek is met fyn haartjies. Die blare is nooit getand nie, maar het stomp en eeltagtige punte.
Elke blomhofie bevat 7 tot 12 blomme en word omvou deur ’n windsel van geel skutblare. Die binnestes of boonstes skutblare vorm ’n rooi spatsel teen die sagte wit blomtoppe.
Saad: Geronde, witterige neut.
